சூர்யா நடிப்பில் வெளிவந்த 'கஜினி' படத்தை இந்தியில் அமீர்கான் நடிக்க ஏ.ஆர்.முருகதாஸ் இயக்கினார். அது வரை வெளிவந்த அனைத்து படங்களின் வசூல் சாதனைகளையும் 'கஜினி' முறியடித்தது. அதன் மூலம் இந்தியிலும் முன்னணி இயக்குனராக வலம் வரத் தொடங்கினார் ஏ.ஆர்.முருகதாஸ்.
சூர்யா நடிப்பில் வெளிவந்த 'சிங்கம்' படத்தை இந்தியில் அஜய் தேவ்கான் நடிக்க ரோஹித் ஷெட்டி இயக்கினார். அப்படம் ஜுலை 22ம் தேதி வெளியாகி வசூலில் முன்னணியில் இருந்து வருகிறது. இப்படத்தின் மூலம் இந்தி திரையுலகிற்கு அறிமுகமாகி உள்ளார் காஜல் அகர்வால்.
இப்படங்களை அடுத்து சூர்யா நடிப்பில் வெளிவந்த 'காக்க காக்க' திரைப்படம் இந்தியில் வெளிவர இருக்கிறது. சூர்யா பாத்திரத்தில் ஜான் ஆப்ரஹாம், ஜோதிகா பாத்திரத்தில் ஜெனிலியா ஆகியோர் நடித்து இருக்கிறார்கள். இப்படம் செப்டம்பர் மாதம் 16ம் தேதி வெளிவர இருக்கிறது.
தற்போது சூர்யா நடித்து முடித்துள்ள படம் 'ஏழாம் அறிவு'. ஏ.ஆர்.முருகதாஸ் இயக்கி இருக்கிறார். தமிழ் திரையுலகில் தற்போது இப்படத்திற்கு பெரும் எதிர்ப்பார்ப்பு நிலவி வருகிறது.
படத்தின் கிராபிக்ஸ் காட்சிகள் அதிகமாக இருப்பதால் படம் அக்டோபர் மாதம் வெளியாக இருக்கிறது. தமிழ், தெலுங்கில் முதலில் இப்படம் வெளியாக இருக்கிறது. தமிழ், தெலுங்கில் வெளியான 20 நாட்கள் கழித்து இப்படம் இந்தியிலும் டப்பிங் செய்யப்பட்டு வெளியாக இருக்கிறது.
0 comments:
Post a Comment